Nunga lobi sataon inanta pardijabu na sai dibagasan parsahiton. Nian sahit na i ndang apala sahit na ingkon peak di parati manang pe opname. Sipata boi do diboanton sahit i jala disukka-sukka do mangula ulaon nata pe ingkon rutin periksa tu rumah sakit jala mangalap daon. Alai tarida do pamatang na sai lam moru ala na sai dibarbari panahit i.
Sian puskesmas tu rumah sakit daerah sahat tu rumah sakit pusat nian nunga binoan anggiat taruli di hamalumon. Ndang dope nian anggo tu Penang songon na jinujuan ni angka dongan na marholong roha mardomu tu situasi ni sihumisik na so sadia. Mauliate ma di panggonggomi ni bangsonta ala diloas dope mardaon so margarar ima naginoarna program JKN manang pe BPJS tung pe sipata jut roha jala jotjot marungut-ungut iba alani panghobasion ni angka parhobasna naso haru hona tu roha.
Sian sude pandaoni naung mamareso jala manangani parsahiton i tung so adong dope na takkas pabotohon manang paboahon aha sahit ni inanta parnijabu hombar tu diagnosa jala pangantusion nasida taringot tu sahit i, alai sai daon ma diresep laho panganon pola do sampe longang jala tarsonggot parkantor BPJS Regional Kabanjahe tingki manjaha data online taringot tu dana manang biaya naung di klaim manang tinobus ni angka pihak rumah sakit mulai sian RSUD Sidikalang, RSUD Kabanjahe, Rumah Sakit Martha Friska Brayan rodi RSUP H. Adam Malik Medan alani godangni biaya naung pinaruar ni pamarenta laho pasiubat/parsidaon ni inanta.
Alani holong ni roha ni angka tondong dohot dongan di inanta pardijabu on jala asini roha nasida mida parsahiton na i, torop do sian nasida i na mangarahon, manjujui jala mangidohon asa "marbisuk" ma ninna hami, atik do tambar sihala. "Marbisuk ma hamu amang bapak Diva, atik do tambar sihala anggiat tarhilala. Marubat batak majo boan inanta inang ni si Diva i. Adong do na malo jala naung somal mangubati sahit si songoni jala nunga attar torop naung mulak malum sian i. Ndang na mamele-mele hita manang pe gabe manomba hariara, gariada adong do sian na tarsurat i dijaha laho angkup ni daon i", ninna nasida be. Gumodang ma tahe na manjujui tusi unang apala tu penang, herbal, terapi dohot lan na asing.
Mauliate situtu do dohonon di sude holong ni roha muna i na patuduhon angka dalan manang anjuran taringot tu parsahiton ni inanta on, sude na i alani holong jala asi ni roha muna do anggiat taruli hamalumon tutu ibana. Ndang apala huboto sasintongna toho manang so toho, mardosa manang so mardosa, maralo manang so maralo ima dalan na pinaboa muna i. Tung Tuhan i do naumbotosa i sude.
Alai sada do siingoton di hami di situasi nuaeng on jala on do nahutiop umbahen ndang huoloi na nidok muna i ale angkka tondong, ale-ale na marholong roha jala na sari di hami : "Debata do pandaoni na sumurung sian sude pandaoni na adong di portibion. Ndang adong huboto na gumogo sian Ibana jala na pos do rohangku tarpatupa Debatangku do lobi sian na hupingkiri."
Santabi bolon di hamu situan natorop, ndang na mandok naung badia au jala ndang na mandok naung adong haporseaonku nasa batu ni singkoru. Alai tung i do na hutiop jala huhaposi, umbaen so tarula ahu dope sude holong muna i. Tangiang muna i amang inang nungnga tung sihalashonon nami jala lobi sian sibahenon ni tangan. Anggiat ma marhite tangiang muna tumibu marhamalumon inanta na tahaholongi on.
Mauliate.