"Bodari Brama Kumbara dohot Justice Bao film".
"Jolo mambuat andor hita tu juma rura, baru mangalean pinahan" ninna si Jeck mambahen syarat asa diloas manonton di jabuna.
Tingki i ari Sabtu dung mulak sian singkola SD Hutaraja.
"Oke, alai loas au manonton bodari dohot sogot da?"
Dungi borhat ma hami tu juma di rura toruan daona hurang lobi sabatu mardalan pat.
Sampulu tuntun (ikat) andor na laho sibuaton, dungkon i jaljalon ma asa dilompa laho allangong ni pinahan nasida.
Hinsa jala ringgas do iba mangulahon syarat i dang adong otik pe ungut-ungut. Baliksa meot-eot do iba ia molo natua-tua niba marsuru pola do sampe marbada dohot haha nang tinodohon niba.
"Tok...tok...tok..."
"Jeeeek..."
Saut ma tutu diloas do iba bornginna i manonton dijabu nasida. Ala naung nioloan gabe "kedan" sian mambuat andor sahat tu na mangalean pinahan songon "tiket" laho manonton.
Adong do dongan naso dapot akses masuk gabe sian duru ma manilik-nilik. Holan angka anak buah do na boi masuk tu bagas. Sabas ma iba manonton saborngin sian Brama Kumbara, Justice Bao sahat tu Jackie Chan. Sahat tu marsogotna pe antong boi ma dapotan bonus manonton Doraemon, Ninja Hatori dohot Power Rangers botarina.
Ndang suda tutu jari-jari ni sambariba tangan mamilangi torop ni nampunasa tivi parabola di huta ujui. Si Ika Jaksa ma didolok, Simbolon ditonga-tonga, Siburian ma di toruan jala Kampung Siregar ma di Juma Sianak.
Sai na adong ma syarat asa diloas dohot manonton. Mambuat andor, mangalean pinahan, manapu kopi, mamipil jagung, nang na mamele marhite siallangon manang jajan rodi na mangalean manang mangkarejoi PR singkola.
Hahaha...tingki dakdanak tahe :)