Nungnga tolu bulan naung borhat si Merry mangaranto, mangalului parkarejoan di Batam. Ditogihon dongan sahuta laos dipatoho tu sada perusahaan elektronik.
Sadarion off do si Merry di parkarejoan laos disangahon martelepon tu huta.
"Halo, ho do on Mer?" ninna Nai Merry mangalusi telepon sian bariba.
"Ido, Mak. Selamat Natal Mak...! Boha kabar muna, sehat do Omak dohot Bapa?"
"Selamat Natal inang. Sehat do hami, ai na nomor baru do muse ho?"
"Tong dope nomorhu naparjolo i Mak, na kebetulan do adong promo kartu perdana jala adong bonus bicarana gabe hutuhor asa boi leleng martelepon tu huta."
"Aha promo...?"
"Hira bonus doi Mak, songon penarikna asa lakku barangna i dibahen ma promo. Alai sementara do waktu ni i."
"Oh, ido?"
"Ido, Mak. Pas adong manggadis dijolo ni PT ingananku karejo i."
"Alai paima jo satongkin da inang, hurang tangkas do hubegei mago-mago do signal dihutanta on. Morot jo au dompak jendela an..." dilangkahon Nai Merry dompak jendela huhut dipisat speaker phone di henponna.
"Olo, Mak."
"Nunga be, nga songon na tangkas be hubegei,"
"Mulak do ho taon baru on inang?" ninna Nai Merry manguduti.
"Dang boi dope au mulak Omak, ala na masa training dope ndang dapot cuti jala sae-sae balanjo dope gajingku. Hape ongkos pe naik ninna. Boru Regar dongan sakamar hu i baru mambuat tiket, arga hian ninna."
"Ido ate, attong unang paksahon dirimu da inang. Toe ma, molo tung so boi pe ho mulak taon on ndang pala manarita au dohot Bapamu. Asal ma hipas-hipas ho, nunga tung las roha nami inang."
"Angka ise pangaranto naung mulak, Omak?"
"Ndang piga dope naung mulak inang, si Bil, si Herlin dohot anggina i, si Alles, si Miska. Holan i dope, si Elvis dohot si Rominda marsogot pe ninna sahat."
"Oh, ito si Lamro ndang mulak haroa Mak?"
"Bulan dua pe ninna, sekalian patandahon calonna i."
"Bah, marpesta nama hita ate Mak..."
"Ido, boru tobing na naeng parumaen i. Nattoari dope dipaboa inangtuamu."
"Oh..., sian Tarutung ate..."
"Di Sipahutar do molo hutana, alai pajumpa di Jakarta do halaki"
"Ambal ni hata, adong hutongos saotik pasinapuranmu da Mak, kakak Lita hudokkon mamboan. Mungkin ndang sahat dope kakak i, nattoari siang baru berangkat."
"Ee tahe...inang. Ai nimmu pe sae balanjomu dope gajim, alai pola ingkon dipaksahon ho inang laho manongos?. Molo au dohot Bapamu, dang na pala ingkon sai adong tongosanmu inang. Holan denggan pe baritam hubege hami di pangarantoanmu, nga mansai las hian roha nami. Hipas ho hubege hami, boi dipalua ho balanjomu dohot pasibadakmu. Holan i pe inang, ndang na sai ingkon manongos ho tu huta. Adong dope gogo ni hauma lao balanjo nami dohot angka tinodohon mon di huta. Sotung pala dipingkiri ho hami. Sandok, malo-malo ma ho mamangke manang sadia pe dapotmu sian parkarejoan. Asa adong bohalmu sogot inang, aut dia ndang songon si nuaeng be ngolu haduan. Sabar ho jala burju-burju ho mangula ulaon. Ido na ringkot begeon nami na tading di huta inang. Ndang moru las ni roha nami tung pe so adong tongosanmu sian pangarantoan."
"Molo i, unang pala pingkiri Omak. Sae dope molo balanjokku dison. Saotik do na hutongos i Omak, pasinapuran sahali mangatup do. Hehe..."
"Attong, mauliate ma inang. Sai tamba ma rejekimu."
"Olo, Mak."
"Nga saut didohoti ho punguan margai? Ringkot do i inang, asa lam tamba parsaoranmu dohot keluarga. Asa adong donganmu marsisungkunan di pangarantoan."
"Nunga, Omak. Dua minggu na salpu au mendaftar. Lumayan torop do hami anggota."
"Attong nga na denggan i inang, malo-malo ma ho marsaor da boru. Ringgas ho mandohoti angka parpunguan dohot partangiangan."
"Olo, Omak."
"Nion itom naing manghatai ninna, sae dope pulsamu?" ninna Nai Merry huhut diirdop si Dion iboto ni si Merry.
"Oh, lean ma Omak asa manghatai au dohot adek i. Godang nai dope TM hu."