 |
| Source : Tokopedia |
Udutan sian Brokat ni Ina Naomi (Ponggol Parjolo)
Marsogot onan godang, dipapungu Nai Martin ma sayur dohot andor naung tinapuna, dihunti, laos mulak ma ibana pola mareak botari.
“Patuat jo huntianhon, Martin…” digorahon anakna si Martin.
“Olo, Oma”
“Naung dilompa ho do bubur ni Bapa?”
“Nungnga Oma, nga mangan Bapa parjolo”
“Pinahan nga mangan?”
“Nunga, Oma. Alai holan andor dohot happa do hulean, nga habis dodak”
“Nanggo alap hian nakkin dodak sian jabu ni Oppung, baru manggiling dope nasida”
“Marsogot ma da Oma, mulak singkola”
“Naung mangallang ubat do, Ho?” ninna Nai Martin tu Amani Martin na peak di podoman.
“Nunga…”
“Adong do moruna?”
“Songonna lumayan do nian”
“Attong, habis ma baen ubat mi. Godang inum tes paet i”
“Olo…”
“Mardalan nakkin aek tu saba?” diuduti Amani Martin.
“Nga hupadalan be, na boccor do attong sian batangi partoru i tu saba ni si Aduhot. Leat do sai marsik lalap”
“Sayur aha itapu ho nakkin?”
“Bayam dohot ingkau rata i do hubuat”
“Nga boi haroa bayam i? Ai baru dope isuan?”
“Nga boi i, asa adong gadison marsogot”
“Ro nakkin Inangbao si Centini mangalului ho, alai dang pala dipaboa lao marhua”
“Sadihari? Nalao paboahon taringot tu seragam nami i do ra i”
“Seragam boha dope? Naso digarar ho dope seragam muna naparpudi on?”
“Ndang i, naeng mambaen seragam ninna muse nabaru. Lao tu ari natal on”
“Bah…lalap mambaen seragam hamu. Nabaru dope mambaen seragam. Nga piga seragam muna?”
“So niantusan akka dongan on, holan dirina do dipingkiri. So dibereng donganna sanggup do manang dang”
“Ingkon do huroa i?”
“Nga songoni kesepakatanni rapot nattoari. Nda mungkin sumalin iba dang marseragam”
“Hape eme disaba lao mamupuk nama, baju natal ni si dakdanak dope. Sian dia nama luluan deba tusi?”
“Au pe nga pusing, alani do umbaenna hutapu bayam i”
“Pittor sadia ma tuhor ni?”
“Tuhor ni sayur manis i ma tambana minggu na ro”
Bersambung…