 |
| Source : Tokopedia |
Di sada punguan koor Ina dung salpu parguruon…
“Ua bereng hamu ma akka inang, bagak seragam ni halakon ate..” ninna Nai Centini huhut dipatudu video ni sada punguan parende di Youtube na adong di HP na.
“Brokat model baru do hubereng i..,” ninna Nai Felicia huhut dipajonok mamereng tu HP ni Nai Centini.
“Bah, tutu…dipayet muse bagian leherna i ate,” ditolopi Nai Marroan.
“Suman hian tu na pinakke ni Inang Nai Ellyn naminggu nalewat, dohot warna nai pe…, ido kan Eda Ellyn?” ninna Nai Gregorius huhut manaili tu Nai Ellyn na hundul dompak pudi.
“Dia majo hubereng Eda,” dialusi Nai Ellyn huhut morot tu lambung ni Nai Centini.
“Ido tutu, pas hian songon brokat nahupangke minggu nasalpu” diuduti Nai Ellyn.
“Coccok do hurasa on seragamta bah, apalagi nga jonok natal…” ninna Nai Centini. Saminggu dope naung mulak Ama ni Centini sian proyek. Pemborong do ulaon ni amanta i.
“Iya kan, Edak Cen... Bikin seragamlah kita untuk natalan ini…” ninna Nai Janette manolopi. Dua bulan dope naung dilantik Amani Janette gabe Kapala Bidang di sada kantor Pemkab.
“Ate, boha tutu akka dongan…tabaen ma dah?” lam digogohon Nai Centini.
“Tasungkun majo inang dirigen, boha inang taben ma tutu seragamta?” ninna Nai Felicia manungkun tu Nai Morhan dirigen nasida.
“Molo au, saguru di hita do. Molo satolop hita, ba tabaen..” ninna Nai Morhan mangalusi.
Alai Nai Martin nunga sai busisaon di hundulanna. Laos dipapungu bibel dohot bukku koorna, dipamasuk tu bagas tasna.
“Parjolo majo au ate akka Inang, dang adong mangaloppa dijabu nami. Hurang sehat muse Bapa ni Si Martin nami dabah…” ninna Nai Martin huhut hehe sian hundulanna.
“Olo Inang, hati-hati Inang…” ninna Nai Morhan.
“Jadi boha do akka dongan, tabaen do seragamta songoni?” ninna Nai Centini manguduti panghataion.
“Hita do Eda, alai molo saut do boi tapesan bakalna sian panuhoranki. Sian online do hutuhor I, tinggal pesan do. Nga leleng hami marlangganan,” ninna Nai Ellyn mangalusi Nai Centini.
“Saut ma attong ah…” ninna Nai Felicia.
“Oke, kalok gitu berarti sah kan?” ninna Nai Janette.
“Sah,…” ninna Nai Centini dohot Nai Felicia rap mangalusi songonna markoor.
Marsogotna…
“Boasa manigor mulak nattoari Eda?” ninna Nai Iren huhut didapothon Nai Martin na mardalan lao tu balian.
“Eh..imada Eda, hurang sehat itom Bapak ni Si Martin, laho mangaloppa sipanganonna. Ido umbaenna pittor mulak au Eda. Boha do saut ni rapot sinattoari?” ninna Nai Martin.
“Gabe saut do hita mambaen seragam I, Eda. Nga dipasahat tu Nai Ellyn laho mamesan sian online.”
“Bah, ido ate…hape sabulan nalewat dope hita na mambaen seragam i ate..?”
“Imada Eda..lomo-lomo ni akka namora on do nian”
“Olo bah..hape sobinoto dope annon sian dia baenon tusi. Baju Natal ni dakdanak dope sipingkiron, mandosak ma sude akka pengeluaran on”
“Toe ma Eda, pinaolo-oloan ma. Roa do molo holan iba annon pulik dang marseragam. Tong ma nisungka-sungka”
“Inama Eda..ale marsirang dison ma hita ate Eda, naeng padalan aek jo au satongkin tu saba. Sian i pe asa mambuat sayur tu darat.”
“Olo Eda,”
Bersambung…
Brokat ni Ina Naomi (Ponggol Paduahon)
Brokat ni Ina Naomi (Ponggol Paduahon)